«Сапаттуу билим» агенттиги 2016-жылы Кыргыз Республикасынын Юстиция министрлигинде катталган. Ушул убакыт аралыгында Агенттик Кыргыз Республикасынын 2003-жылдын 30-апрелиндеги №92 «Билим берүү жөнүндө» мыйзамына (2015-жылдын 16-январындагы №15 редакциясы) жана 2017-жылдын 16-июнундагы №381 Кыргыз Республикасынын Өкмөтүнүн «Башталгыч жана орто кесиптик билим берүү программаларын ишке ашыруучу билим берүү уюмдарын аккредитациялоо тартиби жөнүндө» токтомуна ылайык ички нормативдик-укуктук документтерди иштеп чыккан. Агенттиктин нормативдик-укуктук документтери агенттиктин расмий сайтында жайгаштырылган.
Агенттиктин негизги ишмердүүлүгү билим берүү уюмдары үчүн программалык жана институционалдык аккредитацияларды өткөрүү, ошондой эле билим берүү сапатын жогорулатууга көмөктөшүү максатында окутуучулар курамы үчүн квалификацияны жогорулатуу курстарын, тренингдерди жана семинарларды уюштуруу болуп саналат. Агенттик билим берүүнүн сапатын башкаруу тутумдарын иштеп чыгуу жана ишке ашыруу боюнча тренингдерди өткөрүп, педагогика, психология жана окутуунун инновациялык ыкмалары боюнча корпоративдик семинарларды-тренингдерди жүргүзөт.
Өзүнүн миссиясын жана максаттарын ишке ашыруу үчүн Агенттик эл аралык өнөктөштөрдү тартуу менен эксперттерди даярдоо боюнча окутуу семинарларын өткөрүп, башталгыч, орто жана жогорку кесиптик билим берүү багыттары боюнча алдыңкы адистер менен иш берүүчүлөрдөн турган эксперттердин базасын түзгөн. Учурда бул база 150дөн ашуун адисти камтыйт.
Агенттиктин кызматкерлери анын негизделген күнүнөн тартып Кыргыз Республикасынын Билим берүү жана илим министрлигинин иш-чараларына, билим берүү сапатын камсыз кылуу боюнча эл аралык иш-чараларга активдүү катышып, өлкө ичиндеги жана чет элдик аккредитациялык агенттиктер менен тыгыз кызматташууда.
«Сапаттуу билим» агенттиги 2018-жылы Кыргыз Республикасынын НАС тарабынан расмий таанылган.
Ошондой эле, Агенттик 2019-жылы Евразия билим берүү сапатын баалоо ассоциациясынын (ЕАОКО) мүчөсү, 2020-жылы жогорку билим берүү сапатын камсыз кылуу боюнча эл аралык агенттиктер тармагынын (INQAAHE) толук укуктуу мүчөсү, 2022-жылы Азия-Тынч океан сапат тармагынын (APQN) мүчөсү болгон.
2020-жылы Агенттик Кыргыз Республикасынын Билим берүү жана илим министрлигинен LS200000806 лицензиясын алып, окутуучулар курамы үчүн «Билим берүү процессиндеги педагогика жана психология» жана «Билим берүүнүн сапатын башкаруу системасы» программалары боюнча квалификацияны жогорулатуу курстарын өткөрүү укугуна ээ болгон.
COVID-19 пандемиясына байланыштуу чакырыктарга жооп катары «Сапаттуу билим» агенттиги онлайн аккредитация жүргүзүү боюнча колдонмону иштеп чыгып, электрондук арыз берүү жана өзүн-өзү баалоо платформасын ишке киргизген. Бул платформа Кыргызпатентте 2021-жылдын 13-апрелинде №679 катары катталган.
Өз ишинде «Сапаттуу билим» агенттиги кесипкөйлүк, объективдүүлүк жана ачыктык принциптерин карманат. Аккредитация процессине жакын жана алыскы чет өлкөлөрдүн жогорку квалификациялуу эксперттери тартылат. Бүгүнкү күнгө чейин Агенттик тарабынан 100дөн ашуун жогорку, орто жана башталгыч кесиптик билим берүү программалары жана жалпы билим берүү программалары аккредитациядан өткөрүлүп, институционалдык аккредитациялар жүргүзүлгөн. Аккредитациянын жыйынтыктары жана пикирлер агенттиктин сайтында жарыяланган.
Ошондой эле, «Сапаттуу билим» агенттиги россиялык АККОРК агенттиги менен биргеликте эл аралык жана кесиптик-коомдук аккредитацияларды өткөрүү боюнча келишим түзгөн. 2022-жылдын сентябрь айында Агенттик европалык ASIIN агенттигинде сапат стандарттарына (ESG) шайкештик боюнча тышкы баалоодон өткөн.